Нийтлэл 01 сарын 23, 2019

АМЬДРАЛ САЙХАН: Зарим хүмүүс арав хорин төгрөгийг гандангийн хайрцаг руу хийдэг эсвэл ус авдаг мөнгө гэж боддог юм билээ

Анх  2016 онд задгай мөнгө цуглуулж аав ээжийнхээ цагаан сарын бэлтгэлийг базааж,   цахим орчинд эерэг хандлага түгээж байсан хоёр хүү одоо ч задгай мөнгөө цуглуулсаар байгаа.  Том хүү А.Тэлмүүн тавхан жилийн дараа оюутан боллоо сургалтын төлбөрөө цуглуулж эхлэхгүй бол оройтлоо гэж байна.  Харин дүү А.Төгөлдөр урлаг спортод дуртай учир цуглуулсан мөнгөөрөө шилбэний хамгаалалт хөлийн гидра зэрэг авсан. Ер нь  өөрт хэрэгцээтэй зүйлд мөнгөө зарцуулж илүү дутуу хэрэглээгээ танаж сурч байна. Удахгүй ганган гар утас авна, гэртээ ийм, тийм юм авна гээд  хэвлүүхэн ярих тэдэнтэй  цөөн хором ярилцлаа.

Сайн байцгаана уу. Та хоёрыг хэдийнээ хүмүүс таньдаг болсон. Тэгэхээр юуны түрүүн  мөнгө цуглуулж эхэлснээр та хоёрт ямар өөрчлөлт гарсныг асуумаар байна.

А.Тэлмүүн: Хамгийн анх хоёр жилийн өмнө мөнгө цуглуулж эхэлсэн. Эхэндээ  аав ээж хоёр ч нэг их тоодоггүй байсан юм. Цуглуулах тусам улам зориг ороод, тэвчээртэй болж эхэлсэн. Анх телевиз, сайтын ах эгч нар ирээд ярилцлага авахад гоё мэдрэмж төрж, илүү сайн байх хэрэгтэй юм байна гэж бодсон. Телевизээр ярилцлага өгсний дараа надад хандах хүмүүсийн хандлага өөр болсон. Би ч хичээлдээ сайжирлаа. Багш нар ч урамшуулж, дэмжсэн. Би бүүр анх удаа түүхийн хичээлдээ 100 хувь А үнэлгээ авсан. Илүү хариуцлагатай, илүү тэвчээртэй, бас бодит мөрөөдөлтэй болсон.

А.Төгөлдөр: Ахыгаа дагаж мөнгө хурааж эхлээд зөндөө гоё юм авна гэж боддог байлаа. Бид хоёр зурагтаар гараад эхэлсэн чинь хүмүүсийн хандлага шал өөр болдог юм билээ.  Хүүхдүүд ч их найзлах болсон. Тийм болохоор бид хоёр зөв үлгэр дууриалал үзүүлсэн байх аа гэж бодож байна. Нээрээ ч тийм байсан. Бас би охидод их таалагдаж эхэлсэн. (инээв)

Тэлмүүнээс асууя. Хамгийн анх чи мөнгө цуглуулж эхэлсэн гэсэн. Яг яагаад цуглуулах болсон юм. Мөнгө цуглуулж байж авахыг хүссэн зүйл байсан юм уу?

А.Тэлмүүн: Хүүхдүүд дэлгүүр ороод хүссэн зүйлсээ авдаг. Би ч тэгж болно л доо. Гэхдээ хэмнэж сурна гэдэг надад ч гэр бүлд минь ч хэрэгтэй гэдгийг ойлгосон юм л даа. Нэг удаа би эмээгээсээ 3000 төгрөг аваад дугуйландаа явсан юм. Тэгээд тэр мөнгөөр идэх юм авч идсэн боловч чадаагүй.  Юуг, яаж авсанаа ч анзаараагүй. Тэгэхэд би 3000 төгрөгийн үнэ цэнийг мэдэхгүй дээ л тэгж үрж байсан. Одоо бол 30 төгрөг ч надад үнэ цэнэтэй.  Ер нь мөнгөө яаж зохицуулж хэрэглэхийг сурсан гэх юм уу даа.

Цуглуулсан мөнгөнөөсөө аваад авчихмаар санагдсан зүйл байсан л биздээ?

А.Тэлмүүн: Байсан. Би хорооллын нэг дэлгүүр үнэхээр гоё пүүз харсан. Тэр пүүзийг бүүр үнэхээр авмаар байсан. Мөнгө маань хангалттай хүрч байсан ч би тэр пүүзийг авчихвал миний бас дүүгийн минь өнгөрсөн хугацаанд гаргасан тэвчээр хий дэмий зүйлс болно гэж бодоод аваагүй.

Яаж тэгж тэвчиж чаддаг юм бэ?

А.Тэлмүүн: Тухайн үед бол би ганцаараа энэ пүүзийг ийм үнээр авахын оронд дахиад үргэлжлүүлээд цуглуулбал гэр бүлийнхэндээ бүгдэд нь ийм пүүз авах боломжтой бүгд хамтдаа гангарч болно гэж бодоод тэвчсэн. Ер нь түүнээс хойш надаас илүү хэцүү байгаа хүүхдүүдийг дарж хорхойгоо дардаг болсон. Бодоод байхад надад өмсөх пүүз байхад би тэр пүүзийг авах гэж улайрах шаардлагагүй гэдгийг ойлгосон. Хэрэгцээтэй зүйлс минь байхад нэмж юм авах гээд байна гэдэг шуналтай байгаагийн шинж.  Би бол Эд материалд биш эрдэм мэдлэгт шуналтах болсон. Надад хоёр гурван ээлжийн хувцас байхад бусдад нэг ч байхгүй байсан ч болж байна гэж өөртөө үргэлж хэлдэг.

Төгөлдөр түрүүн ярьж байсан. Дэлгүүрээс юм авчихаад хариултаа авахдаа хүртэл мөнгөө заавал арав, хорин төгрөгөөр авна гээд гүрийчдэг гээд. Яагаад?

А.Төгөлдөр: Нэгэнт задгай мөнгө цуглуулж эхэлсэн болохоор л. Задгай мөнгө цуглуулах нь амархан бас үр дүнтэй. Анзаарч байхад хүмүүс задгай мөнгөний хариултаа авдаггүй юм билээ. Худалдагч нар нь оронд нь ганц чихэр энэ тэр өгөх гээд байдаг.

Чи чихэрт дургүй юм уу. 10 настай хүүхэд чихэр авч идье л гэж боддог биз дээ?

А.Төгөлдөр: Би чихэр их иддэггүй л дээ. Хааяа шоколад л авч иддэг.

Цуглуулж байсан мөнгөнөөсөө шоколад авч идсэн удаа байгаа юу ахаасаа нууцаар?

А.Төгөлдөр: Үнэндээ байгаа л даа. Одоо ингээд баригдчихлаа. Гэхдээ дараа нь аль болох нөхөхийг хичээдэг.

Яг яагаад задгай мөнгө цуглуулах үр дүнтэй гэж? Бүхэл мөнгө хурдан их болох биш үү ?

А.Тэлмүүн: Анх бол 500, 1000 төгрөг цуглуулж эхэлсэн. Гэхдээ дөнгөж тав зургаан мянган төгрөг хүрэнгүүт нь л үрээд байсан. Тэгээд яавал илүү үр дүнтэй, удаан мөнгө хадгалж сурах вэ гэж бодож байгаад задгай мөнгө цуглуулахаар шийдсэн. Задгай мөнгийг удаан цуглуулсан ч тууштай байж чадвал эцсийн дүндээ бүхэл мөнгө цуглуулснаас ч илүү үр дүнтэй юм шиг санагдсан.  

Ядаж л задгай мөнгө бариад дэлгүүрээс юм авъя гээд орохоор худалдагч нь уурлаад авдаггүй юм билээ.

Мөнгөө ер нь хаанаас олдог юм бэ?

А.Төгөлдөр: Дэлгүүрээс авсан задгай мөнгөний хариулт. Ер нь хүмүүс арав хорин төгрөгөө нэг их тоохгүй энд тэнд орхисон байдаг. Аав ээж маань ч тийм байсан. Одоо бол бид хоёр өгдөг болсон. Бас янз бүрийн тэмдэглэлт баяраар хүмүүсийн өгсөн мөнгийг цуглуулна. 

Та хоёр цуглуулсан мөнгөөрөө цусны хавдартай хүүхдийн эмчилгээнд хандивласан гэж сонссон?

А.Тэлмүүн: Хамгийн анх  7 сарын турш 334 мянган төгрөг цуглуулаад мөнгөө аав ээждээ өгсөн юм. Аав ээж хоёр цагаан сарын бэлтгэлдээ зориулсан. Харин дараагийнхаа мөнгийг тэр охинд өгсөн. Фэйсбүүкээр юм үзэж байсан чинь цусны хорт хавдартай охины тухай олж харангуутаа мөнгөө очиж солиулаад бүх мөнгөө данс руу нь хийсэн. Нэг их удаан цуглуулаагүй байсан болохоор 194 мянган төгрөг болсон.

Арав хорин төгрөгөө солиулахад хүндрэл гарч байна уу?

А.Тэлмүүн: Ээж солиулах гээд очихоор гайгүй солиод өгчихдөг юм. Би өөрөө очихоор намайг огт тоодоггүй юм. Нэг удаа үнэхээр би өөрөө солиулахаас өөр аргагүй болоод. Тэгээд  мөнгөө солиулахдаа авч явдаг бор чемодандаа мөнгөө хийгээд 16 цагийн үед банкан дээр очсон. Тэгсэн орой 20 цагаас хаах байж солихгүй одоо манайх хааж байна гээд сольж өгөхгүй байсан. Дэлгүүрээр яваад мөнгөөрөө юм авъя гэсэн ч арав хорин төгрөгийг мөнгө гэж тоохгүй хүмүүс байсанд их гайхсан.

Аав ээж чинь мөнгөнөөс чинь авч байсан удаа бий юу?

А.Тэлмүүн: Би нэг хөгжилтэй ч гэмээр нэг зүйл ярья.  Нэг өдөр гэртээ ирсэн чинь ээж гоё шинэ гуталтай болчихож. Ямар гоё гутал вэ ээжид шинэ гутал авах мөнгө байж дээ гэж бодсон юм. Тэр үед би аавтайгаа цуг  ээждээ хэлэлгүй мөнгө цуглуулж байсан юм. Тухайн үед дөнгөж эхэлж байсан дээр нь хадгалах сав олдохгүй байсан болохоор хөгжим өсгөгчдөө хийчихсэн юм.  Тэгсэн тэр өдөр өсгөгчөө сэгсрээд үзсэн юу ч дуугардаггүй. Сандраад онгойлгоод үзсэн юу ч байгаагүй. Өнөөх ээжийн гоё гутал чинь миний цуглуулсан мөнгөөр авчихсан байсныг мэдээд яг уйлах гэж байсан. Хайран юм гэж бодогдоод л. Тэр өсгөгчийг худалдаж аваад удаагүй байсан болохоор ээж угаасаа дотроо мөнгөтэй иржээ азтай байна шүү л гэж бодоод гутал авчихсан гэсэн. 30 орчим мянган төгрөг байсан байх аа.

Тэлмүүн чинь залуу жүжигчин юм билээ. Ямар ямар дүр бүтээсэн бэ?

А.Тэлмүүн: Анх залуу мөрдөгчид гээд хүүхдийн уран сайхны кинонд проб авч байсан. Тэр шалгаруулалтад би ч гэсэн ороод үзье гэж бодоод орсон. Нийт 300 орчим хүүхдээс 12 хүүхэд шалгаруулахад би тэр 12 хүүхдийн нэг нь болж чадсан. Тэгээд л "Про Стар” Академийн  жүжигчний дугуйланд сурч эхэлсэн. Түүнээс хойш “Үзэсгэлэнт 12 сар”, “Бид очиж явна”, “Толбо”, “Залуу мөрдөгч”  зэрэг кинонуудад гол болон туслах дүрд тоглосон.

Эдгээр кинонд тоглоход хамгийн хэцүү байсан дүр нь аль вэ?

А.Тэлмүүн: “Үзэсгэлэнт 12 сар” дээр аавдаа хаягдаж байгаа хүүхдийн дүр бүтээсэн. Яг энэ жижигхэн хэсгийн тоглолт надад маш их зүйлсийг ойлгуулсан. Хэчнээн муу зүйл хийсэн, хэчнээн болохгүй бүтэхгүй байсан ч уучлалт гэдэг зүйл хүнийг маш их өөрчилдөг, аз жаргалтай болоход хамгийн их нөлөөлдөг зүйл уучлал байдаг юм байна гэдгийг ойлгосон. Дүр маань аавдаа хаягдаад хэцүү байгаа дүр. Уйлах гуниглах хэрэгтэй. Жаахан хэцүү байж магадгүй гэж бодсон чинь үгүй юм билээ. Миний амьдралд ийм зүйл тохиолдвол яах вэ гэж бодонгуут нулимс гараад л гараад л байдаг юм билээ. Дараа нь харин жинхэнэ Тэлмүүндээ орох жаахан хэцүү байсан.

Төгөлдөр ямар мэргэжилтэй  болох вэ?

А.Төгөлдөр: Би урлагийн л хүн болно гэж боддог. Би спортод их сонирхолтой. Гэхдээ ер нь дуучин болно гэж бодож байна.

Чиний хувьд задгай мөнгө ямар  үнэ цэнэтэй вэ?

А.Төгөлдөр: Хүмүүс арав хорин төгрөгийг зөвхөн ус авах мөнгө гэж боддог. Тэгвэл энэ мөнгийг цуглуулаад хадгалаад байвал зурагт ч авч болно. Бага гэж голохгүй л байвал урт хугацаанд илүү том зүйлсийг бүтээж чадах тийм л үнэ цэнэтэй мөнгө дөө.   

 Та хоёр өөрсдийнхөө хадгалсан мөнгөө дандаа гэр бүлдээ бусдад зориулж байсан байна. Хувь хувьдаа зарцуулахаар төлөвлөсөн үү?

А.Төгөлдөр: Одоо бол утсаа эвдэлчихсэн байгаа. Өөрийн хүссэн утсаа авна даа.

А.Тэлмүүн: Одоогоор надад яаралтай хэрэгцээтэй зүйл байхгүй болохоор цуглуулсаар л байна. Би нэгэнт мөнгө хадгалж сурсан болохоор мянга, тавт, аравт хорьт гээд бүхэл мөнгөөр цуглуулах зорилт тавьсан байгаа. Ингэхийн учир нь би одоо тавхан жилийн дараа их сургуульд орно. Тийм болохоор одооноос сургалтын төлбөрөө цуглуулж эхэлнэ.

 

 

 

 

Сэтгэгдэл бичих

    • DR. UROLOGIST
    • 2020-02-21

    Та бөөрийг худалдахыг хүсч байна уу? Та санхүүгийн хямралын улмаас бөөрийг зарж борлуулах боломжийг эрэлхийлж байна уу, юу хийхээ мэдэхгүй байна уу? Дараа нь бидэнтэй холбоо бариад хаягаар бид танд бөөрнийх нь хэмжээгээр санал болгох болно. Яагаад гэвэл манай эмнэлэгт бөөрний дутагдалд орж, имэйл: [email protected] whatsapp: 15733337443 Үнэ: $780,000 USD Та бөөрийг худалдахыг хүсч байна уу? Та санхүүгийн хямралын улмаас бөөрийг зарж борлуулах боломжийг эрэлхийлж байна уу, юу хийхээ мэдэхгүй байна уу? Дараа нь бидэнтэй холбоо бариад [email protected] хаягаар бид танд бөөрнийх нь хэмжээгээр санал болгох болно. Яагаад гэвэл манай эмнэлэгт бөөрний дутагдалд орж, 91424323800802

arrow icon