Энэ долоо хоногийн УИХ-ын нэгдсэн чуулганаар Хөдөлмөрийн тухай хуулийн шинэчилсэн найруулгын төслийн анхны хэлэлцүүлгийг хийнэ. Энэхүү хуулийн төсөлд тусгагдсан зохицуулалтуудаас та бүхэнд хэрэгтэй хэсгийг хүргэж байна.

Хэнд хамаатай вэ ?

Амьдралынхаа төлөө гар хумхилгүй зүтгэж байгаа хэн бүхэнд

Юу өөрчлөгдөх вэ ?

- Ажилтны ээлжийн үндсэн амралтын хугацаа ажлын 20 хоног байна. Ажилласан жилээсээ хамаарч амралтын хугацааг нэмж болно.

- Ажилтныг бөөнөөр халахдаа заавал үйлдвэрчний эвлэл, эсвэл ажилтны төлөөлөгчдөд мэдэгдэнэ.

- Хөдөлмөрийн гэрээгээр ажиллаж байгаа малчны цалин хөлсний 30-аас дээшгүй хувь нь мөнгөн бус хэлбэртэй байж болно.

- Хүүхдийн хөдөлмөр эрхлэх насны доод хэмжээ 15, хөнгөн хөдөлмөр эрхлэх бол 13 нас байна.  

- Ажил олгогч хүүхэд ажилд авахад эрүүл мэндийн үзлэгт хамруулна. Хүүхдийг 18 насанд хүртэл нь хагас жил тутам эрүүл мэндийн үзлэгт хамруулна.

- Оюутан хичээлийн нэг долоо хоногт 20-оос илүүгүй цаг хөдөлмөр эрхэлнэ.

- Цагийн ажилтны нэг цагт ногдох цалингийн хэмжээ ижил ажлын байранд бүрэн цагаар ажилладаг ажилтныхтай адил байна. Цалин хөлсийг нь тухай бүр олгоно.

- Өндөр насны тэтгэвэр тогтоолгосон ахмад настан хөдөлмөр эрхэлж болно.

- Хуурамч диплом бүрдүүлэн ажилд орсон нь тогтоогдвол ажил олгогч гэрээгээ шууд цуцална. 

Ажилтан та ямар эрх эдлэх вэ ?

- Өөрийн хүсэлтээр хүүхдээ 3 нас хүртэл нь асрах эхчүүдийн НДШ-ийг ажил олгогч төлнө.

- Нярай хүүхэд үрчлэн авсан ажилчинд хүүхдийг нь 60 хоногтой болтол дундаж цалин хөлстэй тэнцэх тэтгэмжтэй чөлөө олгоно.

- Нийтээр амрах баярын өдөр долоо хоногийн амралтын өдөртэй давхацвал дараагийн ажлын өдөрт нөхөн амраана.

- Нийтээр амрах баярын өдөр болон долоо хоногийн амралтын өдөр ажилласан ажилтанд дундаж цалин хөлсийг нь 2 дахин нэмэгдүүлж олгоно.

- Алслагдмал газар ажиллаж байгаа ажилтныг ажлын 14 хоног тутамд нэгээс доошгүй хоног амраана.

- Алслагдмал газар ажиллаж байгаа ажилтныг ажилдаа ирэх, буцах боломжоор үнэ төлбөргүй хангаж, хугацааг ажилласан цагт нь оруулан тооцно.

- Бямба, Ням гаригт амрах боломжгүй ажилтныг долоо хоногийн дараалсан хоёр өдөр амруулна.

- Ажилтан, ажил олгогч тохиролцсоноор амралтын өдрийг долоо хоногийн аль нэг өдөр шилжүүлэн амарч болно.

- Шөнө ажилласан ажилтанд ажилласан цаг тутамд үндсэн цалингийн 15 ба түүнээс дээш хувиар тооцож нэмэгдэл олгоно.

Юуг хориглосон бэ ?

-Төрийн болон төрийн өмчийн оролцоотой ААНБ-д нэг гэр бүлийн буюу төрөл садангийн хүмүүс хөрөнгө, мөнгө захиран зарцуулах ажил, албан тушаалд хамт ажиллахыг хориглоно.

- Мөнгөн бус хэлбэрээр олгох цалин хөлсөнд тамхи, согтууруулах ундаа олгохыг хориглоно.

- Хүүхдийг шөнийн болон илүү цагаар, алслагдмал газар ажиллуулахыг хориглоно.