Humans of UB: Хүнд харанхуй мунхагаасаа болоод амьдрал, хөдөлмөрийг ухаарахгүй явдаг үе байдаг

Манай ажил дээр нэг манаач ах байдаг юм. Нас нь 60 дөнгөж гарч байгаа. Над дээр ирсэн хүмүүс бараг л ажигласан байх даа. Тэр ах залуу байхдаа эхнэрээсээ салчихсан. Хоёр охинтой. Тэгээд 24 гараад 48 цаг амардаг. Нэг өдөр нь манай оффис дээр, маргааш нь нэг музейд, нөгөөдөр нь бас нэг оффис дээр ажилладаг. Шөнө 03:00 цаг гэж унтаад өглөө 06:00 гээд сэрнэ. Хүн ажил хийхэд гуравхан цаг унтах хэрэгтэй гэж үздэг хүн л дээ. Яг цагаараа хооллоно. Өдөрт 4 хооллоно. 60 гарч байгаа ч гэсэн залуу хүн шиг сэтгэнэ, цоо эрүүл,цовоо сэргэлэн.За тэр ахын нэрийг Дорж болгож өөрчлөе. Дорж ахгүй юм байхгүй. Ус алдлаа, сангийн турба цоорлоо, цахилгааны асуудал гарлаа гэхэд Дорж ах л бүгдийг зохицуулна. За бүр цайны газрын барааг татна. Бүх хогийг нь асгана. Гадна талбайн хогнуудыг ачуулна. Зарим хүмүүсийн ажилчдын машиныг грашд оруулж байгаад засчина. Мэдэхгүй чадахгүй юм байхгүй. Дорж ахаа хэдэн юм хийх хайрцаг гэхэд тэнд байгаа гээд л гаргаад өгнө. Ямар нэгэн оффис манай барилгад нүүж ирлээ, Дорж ах л зөөнө. Тиймдээ ч тэр ах ажил дээрээ нэр хүндтэй. Амралтад хүмүүс амарч байхад ганцаараа хоног сунгаж гарна. Бүх хүн ахыг хайрлана. Цайны газар өдрийн бүх хоолыг нь дааж орой халуун хоол, халуун саваар дүүрэн цай үлдээнэ. Бусад оффисын хүмүүс цай, тамхиар таслахгүй. Бүр зарим албан байгууллагууд нь хувцас хэрэглэл хүртэл өгнө. Нэг удаа би:
- Дорж ахаа таны хүүхдүүд  юу хийдэг вэ? гэж асуулаа.
- Ах нь залуудаа их муухай ааштай, хүнд туслаж мэддэггүй, бас балгачаад олон ааштай, хачин хачин хэрэг их хийдэг өөдгүй хүн байсан шиг байгаа юм. Эхнэр минь хоёр хүүхдээ аваад надаас салаад явахад л ах нь их юм ойлгосон доо. Одоо үлдсэн 30 жилийнхээ амьдралыг хоёр охиныхоо төлөө л зориулж байна гэв. Гурван байгууллагад харуул хийгээд сардаа 2сая гаран төгрөг олдог. Дээр нь хүмүүс машин тэрэг цахилгаан янз бүрийн юмаа янзуулах, юм зөөлгөхдөө хүртэл санаа зовж халаасны мөнгө өгдөг учир ах мөнгөө цуглуулж байгаад нэг охиноо Бээжинд, нөгөө охиноо Шанхайд сургаж амжсан.Хуучин эхнэр рүүгээ байнга мөнгө шилжүүлнэ. Эхнэр нь хөдөө орон нутагт амьдардаг юм. Ах дахиад ярихдаа:
-

Хүний амьдралд сэтгэл санааг нь өөрчлөх зүйл тохиолдохгүй л бол хүн харанхуй мунхагаасаа болоод амьдралыг, хөдөлмөрийг ойлгохгүй ухаарахгүй яваад л байдаг юм. Эдийн засаг хямарлаа, Монголд амьдрах арга алга байна гээд шал худлаа. Зүгээр л манайхан ажлыг голохдоо л тэр байхгүй юу. Ах нь 60 гарчаад 3 ажил хийгээд болоод байхад зарим залуучууд ганц өдрийн нойр даахгүй хүүхэн шиг шалчигнана. Яаж ийм залхуу байхаар улс орон хөгжнөө. Цз цз цз гэж шүүрс алдана. Хүн муухай сэтгэлтэй, муухай ааштай байж болно. Түүнийгээ л засах хэрэгтэй

гэнэ.
Дорж ах гэнэт 7 хоног алга болчихлоо. Хэл чимээгүй. Бид хэд ч сандарч яачив, ийчив гэж асуухад хээв нэг:
- Ах нь өвөө болох нь. Тэгээд охиноо тосч аваад хамтдаа, аятайхан нэг өрөө байр хайгаад явж байна гэж билээ...

avatar

Авторууд

Санал асуулга

Нийт санал: 5544

2020 оны УИХ-ын сонгуулиар аль нам ялах вэ?

13%
МАН
17%
АН
69%
Шинэ гуравдагч хүчин
  • 13%
  • 17%
  • 69%