Нийтлэл 07 сарын 31, 2018

ГАРААНЫ БИЗНЕС: ERXES маркетингийн багийхан Silicon Valley-г зорино

Бизнес хөгжүүлэлт, дэвшилтэт маркетинг, мэдээлэл технологийн чиглэлээр салбартаа тэргүүлэгч “Нью Медиа Групп” нь 2010 онд байгуулагдсан цагаасаа эхлэн олон улс руу чиглэсэн хэд хэдэн технологийн бүтээгдэхүүн хөгжүүлсээр ирсэн. Эдгээрээс  2018 оны эхний улиралд дотоодын зах зээлд амжилттай нэвтэрсэн “ERXES” маркетинг, борлуулалтын платформ нь олон улсын зах зээлрүү нэвтрэхээр технологийн томоохон компаниудын өлгий нутаг болох Америкийн Нэгдсэн Улсын “Silicon Valley”-г зорихоор болжээ.

“ERXES”  нь хэрэглэгчтэй харилцах, маркетинг борлуулалтын шийдэл санал болгодгоороо HubSpot, Salesforce зэрэг гадны программуудтай төстэй боловч функц, ажиллагаа, байгууллагын онцлогт нийцсэн нэмэлт хөгжүүлэлт хийх боломж зэргээрээ хэрэглэгчдийнхээ хэрэгцээ шаардлага, үйл ажиллагаанд илүү нийцсэн, хиймэл оюун ухаанд суурилсан нээлттэй эхийн платформ юм.

  Түүнчлэн “ERXES” багийнхан 2018 оны 5 сраын 7-нд “Зайсан Хилл” цогцолборт зохион байгуулагдсан “Echelon TOP 100 APAC” 2018 арга хэмжээнд өрсөлдсөнөөс Монгол улсдаа тэргүүлж, Азийн шилдэг 100 гарааны бизнесийн нэг болсон юм. Мөн  2018 оны 6-р сарын турш Ази номхон далайн орнуудаар зохиогдсон томоохон арга хэмжээнүүдэд амжилттай оролцон, гарааны бизнесийн цаашдын хандлага, дэлхий дахины трэнд болон Монголын гарааны бизнесийг олон улсын тавцанд ямар хэмжээнд явж байгааг дэлхий дахинд илтгэн, үнэ цэнэтэй туршлага хуримтлуулан эх орондоо ирсэн.

Дэлхий ертөнц, нийгэм, технологи, бизнес, эрүүл мэнд гэх мэт бүхий л салбарт шинэлэг санаа, инновацийн шийдэл эрэлхийлдэг Silicon Valley өвөрмөц санаа, шийдэл санал болгосон гарааны бизнесүүдийг үргэлж дэмжихийг эрмэлздэг. Тэр ч утгаараа олон олон инкубатор хөтөлбөрийг бодлогынхоо хүрээнд зохион байгуулдгаас ERXES маркетинг, борлуулалтын платформ дараах 4 төрлийн хөтөлбөрт тэнцэж найм болон есдүгээр сарын турш болох дараах арга хэмжээнд оролцохоор болжээ.

2018 оны 8-9 сарын хооронд явагдах дөрвөн хөтөлбөрүүд: 

Founder University (2018 оны 8 сарын 6-8-ны өдөр) 

"Silicon Valley"-н “томчуудын” нэг LAUNCH.co-оос зохион байгуулж буй гурван өдрийн арга хэмжээ бөгөөд хөтөлбөрт хамрагдагчид нь бүтээгдэхүүнээ зах зээлд гаргасан боловч хөрөнгө босгох эхний шатанд хөрөнгө оруулалт татаж чадаагүй гарааны бизнесийн үүсгэн байгуулагчид байх юм. Старт-Апуудын хувьд чухал ойлголтуудын нэг болох найраа, түүнийг хэрхэн төгс хийхээс эхлээд, багаа зөв бүрдүүлэх, зах зээлд өргөжих стратеги, борлуулалтаа зөв оновчлох гэх мэт нэн чухал чадваруудыг олгох энэ хөтөлбөр Сан Франциско хотод явагдана.

 Shape North America (2018 оны 8 сарын 9-12-ны өдөр

Дөрөв хоногийн турш АНУ-ын Сакраменто хотод явагдана. Арга хэмжээг зохион байгуулагч The Global Shapers Community нь “Дэлхийн Эдийн Засгийн Форум”-аас төрөн гарсан, дэлхий даяар 157 улсын 378 хотод 7000 гаруй гишүүнтэйгээр үйл ажиллагаагаа явуулдаг залуусын нэгдэл юм. Дэлхийн нийтийн чиг хандлага, тасралтгүй хувьсан өөрчлөгдөж буй технологийн эрин зуун, түүнтэй хэрхэн хөл нийлүүлэн алхах, ажлын чиг шугамаа хэрхэн тодорхойлох, туршлага, сайн дурын үйл ажиллагаанд хэрхэн нэгдэх гэх мэт хөтөлбөрүүдийг багтаасан энэ арга хэмжээнд оролцогчид өөрсдийгөө сайжруулахын зэрэгцээ чухал харилцаа холбоо тогтооход чухал нөлөө үзүүлнэ.

  Black Box Connect 23 (2018 оны 8 сарын 13-24-ний өдөр)

 Хоёр долоо хоногийн хугацаанд хэрэгжих уг хөтөлбөр нь дэлхийн өнцөг булан бүрээс гарааны бизнесийн үүсгэн байгуулагчдыг өндөр шалгаруулалтын хүрээнд цугларуулж, цаашдын үйл ажиллагаа, хоорондын харилцаа холбоог нь сайжруулах зорилготой юм. Сонгогдсон оролцогчид Сан Франциско хотод хоёр долоо хоногийн турш байрлан, энэ хөтөлбөрт хамрагдсан CEO нар “Silicon Valley” хэрхэн ажилладаг мөн тэндхийн хүмүүстэй чухал харилцаа холбоо тогтоохоос эхлээд бизнесийн стратегиа тодорхойлох, дэлхий дахинд танигдах, бүтээгдэхүүн, хөрөнгө босгох арга техникүүд болон туршлагатай мэргэжилтнүүдээс зөвлөгөө авах зэрэг маш чухал ач холбогдолтой хөтөлбөрүүдийг сургалт хэлбэрээр авна.

 TechCrunch Disrupt (2018 оны 9 сарын 5-7-ны өдөр) 

Энэ хөтөлбөр нь бүхэлдээ Гарааны бизнесийн тухай бөгөөд Технологийн салбар болон гарааны бизнесийн акулууд илтгэл тавьж туршлагаа хуваалцана. Арга хэмжээний гол хэсэг бол эхний шатандаа яваа гарааны бизнесүүд найраа буюу Pitch-ээрээ хоорондоо өрсөлдөх ба ялагч нь TechCrunch-н тайзан дээрээс 100,000 ам.долларын шагналыг хожихын зэрэгцээ хэвлэл мэдээллийн хэрэгслүүд, хамгийн гол нь хөрөнгө оруулагчдад өөрсдийгөө таниулах боломжтой. Дэлхийд танигдсан хэд хэдэн технологийн компани энэ арга хэмжээний ялагчид болж байсан бөгөөд TechCrunch-ийн тайзнаа өрсөлдөж байсан старт-апууд нийт 8 тэрбум ам.долларын хөрөнгийг бусад талбарууд дээрээс босгож чадсан тоо баримт байдаг.

 

 

 

Сэтгэгдэл бичих

arrow icon